കുമളി: വന്യജീവി വാരാഘോഷത്തിന്‍റെ സംസ്ഥാനതല ഉദ്ഘാടനത്തിനായി തേക്കടി ആനച്ചാല്‍ പാര്‍ക്കിംഗ് ഗ്രൗണ്ടില്‍ ഒരുക്കിയ പന്തല്‍ തകര്‍ന്നുവീണു. മൂന്ന് പൊലിസ് ഉദ്യോഗസ്ഥര്ക്കും ലൈറ്റ് ആന്‍ഡ് സൗണ്ട് വിഭാഗത്തിലെ ജീവനക്കാരനും പരിക്കേറ്റു. വലിയ ദുരന്തം ഒഴിവായത് തലനാരിഴയ്ക്കാണ് .
വനംവകുപ്പ് മന്ത്രി ഷിബു ബേബി ജോണ്‍ പങ്കെടുത്ത വന്യജീവി വാരാഘോഷത്തിന്‍റെ സംസ്ഥാനതല ഉദ്ഘാടന പരിപാടി അവസാനിച്ച് മന്ത്രി വേദി വിട്ടശേഷമായിരുന്നു അപകടം. മന്ത്രി പോയതോടെ പന്തലിലുണ്ടായിരുന്ന സ്‌കൂള്‍, കോളജ് വിദ്യാര്‍ഥികളടക്കമുള്ള നൂറുകണക്കിന് ആളുകള്‍ പുറത്തേക്കിറങ്ങി അരമണിക്കൂറിനിടെ പന്തൽ നിലം പതിക്കുകയായിരുന്നു.
പന്തലിനുള്ളില്‍ ഭക്ഷണശേഷം വിശ്രമിക്കുകയായിരുന്ന പൊലിസുകാരും ലൈറ്റ് ആന്‍ഡ് സൗണ്ട് ജീവനക്കാരുമാണ് അപകടത്തിൽപ്പെട്ടത്. പന്തൽ തകര്‍ന്നു വീഴുന്നതുകണ്ട പൊലിസുകാര്‍ പുറത്തേക്ക് ഓടി മാറുന്നതിനിടെ പന്തല്‍ ഇവര്‍ക്കുമേല്‍ പതിച്ചു.
പൊലിസ് ഉദ്യോഗസ്ഥരായ പി. ധനേഷ് (39), സുഭാഷ് ബാലന്‍ (43), അനില്‍ പ്രസാദ് (39) എന്നിവര്‍ക്കും ലൈറ്റ് ആന്‍ഡ് സൗണ്ട് ഓപ്പറേറ്റർ സജിക്കുമാണ് പരിക്കേറ്റത്. പൊലിസ് ഉദ്യോഗസ്ഥരെ കുമളി കുടുംബാരോഗ്യ കേന്ദ്രത്തിലും സജിയെ സ്വകാര്യ ആശുപത്രിയിലും പ്രവേശിപ്പിച്ചു. പൊലിസ് ഉദ്യോഗസ്ഥര്ക്ക് തലയ്ക്കാണ് പരിക്കേറ്റത്. പന്തലിനുള്ളിലെ പ്രധാന വേദി ഉള്‍പ്പടെയുള്ള ഭാഗം വടമുപയോഗിച്ച് കെട്ടിയിരുന്നത് പിന്നിലുള്ള ഇരുമ്പ് വേലിയിലായിരുന്നു. ഇരുമ്പ് വേലി തകര്‍ന്ന് പന്തല്‍ മുഴുവനായും നിലം പൊത്തുകയായിരുന്നു.
മന്ത്രി ഉള്‍പ്പടെയുള്ള സമയത്താണ് അപകടമുണ്ടായിരുന്നെങ്കിൽ വൻ ദുരന്തത്തിനു കാരണമായേനെ. അപകടത്തിന്‍റെ കാരണം സംബന്ധിച്ച് അധികൃതര്‍ പരിശോധന ആരംഭിച്ചു. വേദിയുടെ നിര്‍മാണത്തിലെ കാര്യങ്ങൾ സംബന്ധിച്ച് ഉടന്‍ റിപ്പോര്‍ട്ട് നല്‍കണമെന്ന് അധികൃതര്‍ക്ക് നിര്‍ദേശം നല്‍കിയതായി വനംവകുപ്പ് മന്ത്രി ഷിബു ബേബി ജോണ്‍ അറിയിച്ചു.
Deepika
E-paper LOGIN
LOGIN